ಡಿಸೆಂಬರ್ 4 ರಿಂದ 13 ರವರೆಗೆ ‘ಬೆಂಗಳೂರು ಜಾತ್ರೆ
ಬೆಂಗಳೂರು:ನಗರವನ್ನು ವಾಸಿಸಲು ಯೋಗ್ಯವನ್ನಾಗಿ ಮಾಡುವುದು ಯಾವುದು ಮೂಲಸೌಕರ್ಯಗಳೇ ಅಥವಾ ಜನರು ಪ್ರತಿದಿನ ಅನುಭವಿಸುವ ಸಣ್ಣ ಸಣ್ಣ ವಿವರಗಳೇ? – ಮಳೆಯಿಂದ ರಕ್ಷಣೆ ನೀಡುವ ಬಸ್ ತಂಗುದಾಣ, ಕತ್ತಲಾದ ನಂತರ ಸುರಕ್ಷಿತವಾಗಿರುವ ಬೆಳಕಿನ ಬೀದಿ, ಹಿರಿಯ ನಾಗರಿಕರು ವಿಶ್ರಮಿಸಲು ಇರುವ ಬೆಂಚ್, ಅಥವಾ ಅಪರಿಚಿತ ಪ್ರದೇಶದಲ್ಲಿ ದಾರಿ ತೋರಿಸುವ ನಾಮಫಲಕ ಇವುಗಳೇ ಅಲ್ಲವೇ?
ನಗರ ಜೀವನದ ಈ ದೈನಂದಿನ ಅಂಶಗಳನ್ನು ಮರುವಿನ್ಯಾಸಗೊಳಿಸಲು ಬೆಂಗಳೂರು ತನ್ನ ನಾಗರಿಕರನ್ನು ಆಹ್ವಾನಿಸುತ್ತಿದೆ. ‘ಬೆಂಗಳೂರು ಜಾತ್ರೆ’ಯ ಅಡಿಯಲ್ಲಿ ಹಮ್ಮಿಕೊಳ್ಳಲಾದ ‘ಬೆಂಗಳೂರು ಡಿಸೈನ್: ಓಪನ್ ಕಾಲ್’ (Bengaluru Design: Open Call) ಕಾರ್ಯಕ್ರಮವು ಬೀದಿ ದೀಪಗಳು, ಬಸ್ ತಂಗುದಾಣಗಳು, ಬೆಂಚ್‌ಗಳು, ರಸ್ತೆ ವಿಭಾಜಕಗಳು, ಕಸದ ತೊಟ್ಟಿಗಳು, ಅಂಗಡಿ ಮುಂಗಟ್ಟುಗಳು ಮತ್ತು ನೆರೆಹೊರೆಯ ಗುರುತುಗಳನ್ನು ಸುಧಾರಿಸಲು ಪ್ರಾಯೋಗಿಕ ಚಿಂತನೆಗಳನ್ನು ಆಹ್ವಾನಿಸುತ್ತಿದೆ. ಸಾರ್ವಜನಿಕರು ನಗರದ 500 ಮೀಟರ್ ವಿಸ್ತೀರ್ಣದ ಸಂಪೂರ್ಣ ರಸ್ತೆಯ ಸುಧಾರಣೆಗೂ ತಮ್ಮ ಪ್ರಸ್ತಾಪಗಳನ್ನು ಸಲ್ಲಿಸಬಹುದು.
ಆಯ್ಕೆಯಾದ ಪ್ರಸ್ತಾಪಗಳನ್ನು ಡಿಸೆಂಬರ್ 4 ರಿಂದ 13, 2026 ರವರೆಗೆ ನಡೆಯುವ ‘ಬೆಂಗಳೂರು ಜಾತ್ರೆ’ಯಲ್ಲಿ ಪ್ರದರ್ಶಿಸಲಾಗುತ್ತದೆ. ಭರವಸೆಯ ಆಲೋಚನೆಗಳನ್ನು ಕಾರ್ಯಸಾಧ್ಯತೆಗೆ ಒಳಪಟ್ಟು, ಅನುಷ್ಠಾನಗೊಳಿಸಲು ಸಂಬಂಧಪಟ್ಟ ಮಹಾನಗರ ಪಾಲಿಕೆಗಳೊಂದಿಗೆ ಹಂಚಿಕೊಳ್ಳಲಾಗುತ್ತದೆ.
ಬೆಂಗಳೂರು ನಗರಾಭಿವೃದ್ಧಿ ಸಚಿವ ಕೃಷ್ಣ ಬೈರೇಗೌಡ ಮಾತನಾಡಿ, “ನಗರವನ್ನು ಕೇವಲ ಪ್ರಮುಖ ಮೂಲಸೌಕರ್ಯಗಳಿಂದ ಮಾತ್ರವಲ್ಲ, ಜನರು ಬಳಸುವ ದೈನಂದಿನ ಸ್ಥಳಗಳ ಮೂಲಕವೂ ಅನುಭವಿಸಲಾಗುತ್ತದೆ. ಬೆಂಗಳೂರನ್ನು ಹೆಚ್ಚು ಸುಲಭವಾಗಿ ತಲುಪುವ, ಆಕರ್ಷಕ ಮತ್ತು ವಾಸಯೋಗ್ಯವಾಗಿಸುವ ಆಲೋಚನೆಗಳನ್ನು ನಾಗರಿಕರು ತರಬೇಕೆಂದು ನಾವು ಬಯಸುತ್ತೇವೆ. ಈ ಉದ್ಯಮವು ಜನರ ಸೃಜನಶೀಲತೆಯನ್ನು ನಗರದ ಅಗತ್ಯಗಳೊಂದಿಗೆ ಜೋಡಿಸುವ ಒಂದು ಅವಕಾಶವಾಗಿದೆ,” ಎಂದರು.
ಬೆಂಗಳೂರಿಗರಿಗೆ ಇವು ಕೇವಲ ತಾತ್ವಿಕ ವಿನ್ಯಾಸದ ಪ್ರಶ್ನೆಗಳಲ್ಲ. ಮಿಲಿಯನ್‌ಗಟ್ಟಲೆ ಜನರು ದೈನಂದಿನ ಜೀವನದಲ್ಲಿ ಜನನಿಬಿಡ ರಸ್ತೆಗಳಲ್ಲಿ ಸಂಚರಿಸುವ, ಸಾರ್ವಜನಿಕ ಸಾರಿಗೆಗಾಗಿ ಕಾಯುವ ಮತ್ತು ನೆರೆಹೊರೆಯಲ್ಲಿ ಓಡಾಡುವ ದೈನಂದಿನ ಅನುಭವಗಳಾಗಿವೆ. ಆದಾಗ್ಯೂ, ದೊಡ್ಡ ಮೂಲಸೌಕರ್ಯ ಯೋಜನೆಗಳಿಗೆ ಹೋಲಿಸಿದರೆ ಈ ಸಾಧಾರಣ ವಾತಾವರಣವು ಕಡಿಮೆ ಗಮನ ಸೆಳೆಯುತ್ತದೆ. ಆದರೆ, ಯೋಜನಾಬದ್ಧವಾಗಿ ವಿನ್ಯಾಸಗೊಳಿಸಲಾದ ಬಸ್ ತಂಗುದಾಣ, ಸುರಕ್ಷಿತ ಬೀದಿಗಳು ಅಥವಾ ಸಾರ್ವಜನಿಕ ಸ್ಥಳಗಳು ಜನರು ನಗರವನ್ನು ಅನುಭವಿಸುವ ರೀತಿಯಲ್ಲಿ ಗಮನಾರ್ಹ ಬದಲಾವಣೆಯನ್ನು ತರಬಲ್ಲವು.
ಈ ಯೋಜನೆಯ ಹಿಂದಿನ ಉದ್ದೇಶ
ಈ ಯೋಜನೆಯ ಮೂಲ ಪ್ರಶ್ನೆ ಏನೆಂದರೆ: “ನಗರದ ರೂಪುರೇಷೆಯನ್ನು ನಿರ್ಧರಿಸುವವರು ಯಾರು?” ‘ಬೆಂಗಳೂರು ಡಿಸೈನ್: ಓಪನ್ ಕಾಲ್’ ನಗರದಲ್ಲಿ ವಾಸಿಸುವ, ಕೆಲಸ ಮಾಡುವ ಮತ್ತು ನಗರವನ್ನು ಅರ್ಥಮಾಡಿಕೊಂಡ ಜನರಿಗೆ ತಮ್ಮ ಸುತ್ತಮುತ್ತಲಿನ ವಾತಾವರಣವನ್ನು ಹೊಸ ದೃಷ್ಟಿಕೋನದಿಂದ ನೋಡಲು ಹಾಗೂ ಪ್ರಾಯೋಗಿಕ, ಕಡಿಮೆ ವೆಚ್ಚದ ಮತ್ತು ಎಲ್ಲರನ್ನೂ ಒಳಗೊಳ್ಳುವ ಪರಿಹಾರಗಳನ್ನು ನೀಡಲು ಆಹ್ವಾನಿಸುತ್ತದೆ.
ಇದು ನಗರದ ಕೊರತೆಗಳನ್ನು ಬೆಟ್ಟು ಮಾಡಿ ತೋರಿಸುವುದನ್ನು ಬಿಟ್ಟು, ಸುಧಾರಣೆಯ ಹಾದಿಯಲ್ಲಿ ಯೋಚಿಸಲು ನೀಡಲಾದ ಉತ್ತಮ ಅವಕಾಶವಾಗಿದೆ.
ವಿದ್ಯಾರ್ಥಿಯೊಬ್ಬರು ಉತ್ತಮ ಬಸ್ ತಂಗುದಾಣದ ವಿನ್ಯಾಸ ಮಾಡುವುದು, ವಾಸ್ತುಶಿಲ್ಪಿಯೊಬ್ಬರು ಪಾದಚಾರಿ ಸ್ನೇಹಿ ರಸ್ತೆಯನ್ನು ಮರುರೂಪಿಸುವುದು, ಕಲಾವಿದರೊಬ್ಬರು ಸ್ಥಳೀಯ ಸಂಸ್ಕೃತಿಯ ಐಡೆಂಟಿಟಿ ನೀಡುವುದು ಅಥವಾ ಹೊಸ ವಿನ್ಯಾಸಕರು ಸಾರ್ವಜನಿಕ ಸ್ಥಳಗಳನ್ನು ಇನ್ನಷ್ಟು ಪ್ರವೇಶಿಸಬಹುದಾಗಿ ಮಾಡುವುದು – ಇವೆಲ್ಲವೂ ಈ ಯೋಜನೆಯ ಆಶಯವಾಗಿದೆ.
ಸೃಜನಶೀಲ ಚಿಂತನೆ ಮತ್ತು ದೈನಂದಿನ ನಗರ ಜೀವನದ ನೈಜತೆಗಳ ನಡುವೆ ಸಂಪರ್ಕವನ್ನು ಏರ್ಪಡಿಸುವುದು ಈ ಆಹ್ವಾನದ ಮುಖ್ಯ ಉದ್ದೇಶವಾಗಿದೆ.
ಬೀದಿ ದೀಪಗಳಿಂದ ನೆರೆಹೊರೆಯ ಗುರುತುಗಳವರೆಗೆ: ದೈನಂದಿನ ಸಂಗತಿಗಳ ಮರುಚಿಂತನೆ
ವಿನ್ಯಾಸ ಸವಾಲುಗಳು ಸಾರ್ವಜನಿಕರ ಜೀವನದ ಮೇಲೆ ಪರಿಣಾಮ ಬೀರುವ ವಿವಿಧ ವಸ್ತುಗಳು, ಸ್ಥಳಗಳು ಮತ್ತು ವ್ಯವಸ್ಥೆಗಳನ್ನು ಒಳಗೊಂಡಿವೆ:
- ಬೀದಿ ದೀಪಗಳು (Streetlights): ಪಾದಚಾರಿಗಳಿಗೆ ದೃಶ್ಯಾವಳಿಯನ್ನು ಹೆಚ್ಚಿಸಿ, ರಸ್ತೆಗಳನ್ನು ಸುರಕ್ಷಿತವಾಗಿಸುವುದರ ಜೊತೆಗೆ ನೆರೆಹೊರೆಯ ಸೌಂದರ್ಯವನ್ನು ಹೆಚ್ಚಿಸಲು ಬೀದಿ ದೀಪಗಳ ರೂಪ, ಜೋಡಣೆ ಮತ್ತು ಕಾರ್ಯಕ್ಷಮತೆಯನ್ನು ಮರುಚಿಂತನೆ ಮಾಡಬಹುದು.
- ಬಸ್ ತಂಗುದಾಣಗಳು (Bus stops): ಮಳೆ ಮತ್ತು ಬಿಸಿಲಿನಿಂದ ಉತ್ತಮ ಆಶ್ರಯ, ಆರಾಮದಾಯಕ ಕಾಯುವ ಸ್ಥಳ, ವಿಕಲಚೇತನರಿಗೆ ಸುಲಭ ಪ್ರವೇಶ ಹಾಗೂ ಪ್ರಯಾಣಿಕರಿಗೆ ಅನುಕೂಲಕರ ಅನುಭವವನ್ನು ಹೇಗೆ ನೀಡಬಹುದು?
- ಬೆಂಚ್‌ಗಳು (Benches): ಸಾರ್ವಜನಿಕ ಆಸನಗಳು, ವಿಶೇಷವಾಗಿ ಹಿರಿಯ ನಾಗರಿಕರು ಮತ್ತು ಮಕ್ಕಳಿಗೆ ವಿಶ್ರಮಿಸಲು ಅನುಕೂಲಕರವಾಗಿರುತ್ತವೆ. ಇವುಗಳ ಆರಾಮ, ಬಾಳಿಕೆ ಮತ್ತು ವಿನ್ಯಾಸದ ಆಲೋಚನೆಗಳನ್ನು ಸಲ್ಲಿಸಬಹುದು.
- ರಸ್ತೆ ವಿಭಾಜಕಗಳು (Road medians): ಕೇವಲ ರಸ್ತೆ ವಿಭಾಜಕಗಳಾಗಿ ಉಳಿಯದೆ, ಹಸಿರು ಹಾಗೂ ಸುಂದರ ವಿನ್ಯಾಸಗಳ ಮೂಲಕ ರಸ್ತೆ ಸುರಕ್ಷತೆ ಮತ್ತು ಸ್ಥಳೀಯ ವಾತಾವರಣಕ್ಕೆ ತಕ್ಕಂತೆ ಇವುಗಳನ್ನು ಮರುರೂಪಿಸಬಹುದು.
- ಕಸದ ತೊಟ್ಟಿಗಳು (Waste bins): ಸಾರ್ವಜನಿಕರಿಗೆ ಸುಲಭವಾಗಿ ಬಳಸಲು, ಬಾಳಿಕೆ ಬರುವಂತೆ ಮತ್ತು ನಿರ್ವಹಣೆಗೆ ಸರಳವಾಗಿರುವಂತೆ ಕಸದ ತೊಟ್ಟಿಗಳನ್ನು ಹೇಗೆ ವಿನ್ಯಾಸಗೊಳಿಸಬಹುದು?
- ನಾಮಫಲಕಗಳು ಮತ್ತು ನಾಗರಿಕ ಚಿಹ್ನೆಗಳು (Signboards and civic signage): ಸ್ಪಷ್ಟವಾದ ಅಕ್ಷರಗಳು, ಸುಲಭ ಸಂಚಾರ ಮಾರ್ಗಗಳು ಮತ್ತು ದೃಶ್ಯ ವಿನ್ಯಾಸಗಳ ಮೂಲಕ ನಾಗರಿಕರಿಗೆ ದಾರಿ ಕಂಡುಕೊಳ್ಳಲು ಸಹಾಯ ಮಾಡುವ ಸೂಚನಾ ಫಲಕಗಳನ್ನು ರೂಪಿಸುವುದು.
- ಅಂಗಡಿ ಮುಂಗಟ್ಟುಗಳು (Shopfronts): ಸ್ಥಳೀಯ ಮಾರುಕಟ್ಟೆಗಳ ಐಡೆಂಟಿಟಿಯನ್ನು ಉಳಿಸಿಕೊಂಡು, ಅಂಗಡಿಗಳ ಮುಂಭಾಗವನ್ನು ಹೇಗೆ ಹೆಚ್ಚು ಆಕರ್ಷಕವಾಗಿ ಮತ್ತು ಸುಂದರವಾಗಿ ಕಾಣುವಂತೆ ಮಾಡಬಹುದು?
- ನೆರೆಹೊರೆಯ ಗುರುತುಗಳು (Neighbourhood identities): ಬೆಂಗಳೂರಿನ ಪ್ರತಿಯೊಂದು ಪ್ರದೇಶದ ಇತಿಹಾಸ, ಕಥೆಗಳು ಮತ್ತು ಸಂಸ್ಕೃತಿಯನ್ನು ಪ್ರತಿಬಿಂಬಿಸುವ ದೃಶ್ಯ ಗುರುತುಗಳನ್ನು ಅಭಿವೃದ್ಧಿಪಡಿಸುವುದು.
500 ಮೀಟರ್ ರಸ್ತೆಯ ಮರುವಿನ್ಯಾಸ: ಒಂದು ಪ್ರಮುಖ ಸವಾಲೆಂದರೆ 500 ಮೀಟರ್ ವಿಸ್ತೀರ್ಣದ ಸಂಪೂರ್ಣ ರಸ್ತೆಯನ್ನು ಮರುವಿನ್ಯಾಸಗೊಳಿಸುವುದು. ಇದು ಪಾದಚಾರಿಗಳ ಸಂಚಾರ, ರಸ್ತೆ ದಾಟುವಿಕೆ, ಹಸಿರು, ಬೆಳಕು, ಸಾರ್ವಜನಿಕ ಸಾರಿಗೆ, ಸುರಕ್ಷತೆ ಮತ್ತು ಸುತ್ತಮುತ್ತಲಿನ ವಾತಾವರಣವನ್ನು ಒಟ್ಟಾಗಿ ಜೋಡಿಸುವ ಸಮಗ್ರ ವಿನ್ಯಾಸವನ್ನು ಬಯಸುತ್ತದೆ.
5 ಮಹಾನಗರ ಪಾಲಿಕೆಗಳಿಗೆ ಪ್ರತ್ಯೇಕ ಗುರುತು ಇರಬಹುದೇ?
ಬೃಹತ್ ಬೆಂಗಳೂರು ಪ್ರಾಧಿಕಾರದ (GBA) ಅಡಿಯಲ್ಲಿ ಬರುವ ಬೆಂಗಳೂರಿನ ಐದು ಮಹಾನಗರ ಪಾಲಿಕೆಗಳ ಗುರುತನ್ನು (Identity) ಈ ಸವಾಲು ಪರಿಶೀಲಿಸುತ್ತದೆ. ಪ್ರತಿಯೊಂದು ಪಾಲಿಕೆಯು ತನ್ನ ನೆರೆಹೊರೆಯ ಸಂಸ್ಕೃತಿಯನ್ನು ಪ್ರತಿಬಿಂಬಿಸುತ್ತಾ, ಬೆಂಗಳೂರಿನ ಒಟ್ಟಾರೆ ಚೌಕಟ್ಟಿನಲ್ಲಿ ಹೇಗೆ ಪ್ರತ್ಯೇಕ ಹಾಗೂ ಸಂಪರ್ಕಿತ ದೃಶ್ಯ ಗುರುತನ್ನು ಹೊಂದಿರಬಹುದಾಗಿದೆ.
ಪ್ರಾಯೋಗಿಕ ಮತ್ತು ನೈಜ ಆಲೋಚನೆಗಳಿಗೆ ಆದ್ಯತೆ
ಈ ಮುಕ್ತ ಆಹ್ವಾನವು ಕೇವಲ ಸುಂದರವಾದ ಚಿತ್ರಗಳು ಅಥವಾ ಬೃಹತ್ ಕಲ್ಪನೆಗಳಿಗೆ ಮಾತ್ರ ಸೀಮಿತವಾಗಿಲ್ಲ. ನಗರದ ನೈಜ ಪರಿಸ್ಥಿತಿಗೆ ಸ್ಪಂದಿಸುವ ವಿನ್ಯಾಸಗಳಿಗೆ ಹೆಚ್ಚಿನ ಆದ್ಯತೆ ನೀಡಲಾಗುತ್ತದೆ. ಪ್ರಸ್ತಾಪಗಳು ಪ್ರಾಯೋಗಿಕವಾಗಿ, ಕಡಿಮೆ ವೆಚ್ಚದಲ್ಲಿ, ಸುಲಭವಾಗಿ ನಿರ್ವಹಿಸಬಹುದಾದಂತೆ ಮತ್ತು ನಾಗರಿಕ ಆಡಳಿತ ಪ್ರಕ್ರಿಯೆಗೆ ಸೂಕ್ತವಾಗಿರಬೇಕು.
ಸಚಿವ ಕೃಷ್ಣ ಬೈರೇಗೌಡ ಅವರು ಮಾತನಾಡಿ, “ಉತ್ತಮ ವಿನ್ಯಾಸವು ಕೇವಲ ನೋಡಲು ಸುಂದರವಾಗಿದ್ದರೆ ಸಾಲದು. ಅದು ರಸ್ತೆಯಲ್ಲಿ ಕಾರ್ಯಸಾಧ್ಯವಾಗಿರಬೇಕು, ನಿರ್ವಹಿಸಲು ಕೈಗೆಟುಕುವಂತಿರಬೇಕು, ಜನರ ದೈನಂದಿನ ಅನುಭವವನ್ನು ಸುಧಾರಿಸಬೇಕು ಮತ್ತು ನಮ್ಮ ನಾಗರಿಕ ಸಂಸ್ಥೆಗಳಿಗೆ ಅನುಷ್ಠಾನಗೊಳಿಸಲು ಪ್ರಾಯೋಗಿಕವಾಗಿರಬೇಕು,” ಎಂದರು.
ಈ ಆಹ್ವಾನವು ವಿಶೇಷವಾಗಿ ಬೆಂಗಳೂರಿನ ಯುವಜನತೆ ಮತ್ತು ವಿದ್ಯಾರ್ಥಿಗಳಿಗೆ ತಮ್ಮ ನಗರಕ್ಕಾಗಿ ಆಲೋಚನೆಗಳನ್ನು ಕಾರ್ಯರೂಪಕ್ಕೆ ತರಲು ಉತ್ತಮ ಅವಕಾಶವಾಗಿದೆ.
ಆಯ್ಕೆಯಾದ ವಿನ್ಯಾಸಗಳು ‘ಬೆಂಗಳೂರು ಜಾತ್ರೆ’ಯಲ್ಲಿ ಪ್ರದರ್ಶನ; ಬಿಜಿಎ ತೀರ್ಪುಗಾರರಿಂದ ವಿಜೇತರ ಆಯ್ಕೆ
ಆಯ್ಕೆಯಾದ ಪ್ರಸ್ತಾಪಗಳನ್ನು ಹಬ್ಬದ ಸಮಯದಲ್ಲಿ ಸಾರ್ವಜನಿಕ ಪ್ರದರ್ಶನಕ್ಕೆ ಇಡಲಾಗುತ್ತದೆ, ಇದರಿಂದ ಸಾರ್ವಜನಿಕರು ತಮ್ಮ ಅಭಿಪ್ರಾಯಗಳನ್ನು ನೀಡಬಹುದು.
ಉತ್ತಮ ಆಲೋಚನೆಗಳನ್ನು ಬೃಹತ್ ಬೆಂಗಳೂರು ಪ್ರಾಧಿಕಾರ (GBA) ರಚಿಸಿದ ತೀರ್ಪುಗಾರರ ಮಂಡಳಿಯು ಮೌಲ್ಯಮಾಪನ ಮಾಡುತ್ತದೆ. ಆಯ್ಕೆಯಾದ ವಿನ್ಯಾಸಗಳನ್ನು ತಾಂತ್ರಿಕ, ಹಣಕಾಸು ಮತ್ತು ಕಾರ್ಯಾಚರಣೆಯ ಸಾದ್ಯತೆಗಳನ್ನು ಆಧರಿಸಿ ಅನುಷ್ಠಾನಕ್ಕಾಗಿ ಸಂಬಂಧಪಟ್ಟ ಮಹಾನಗರ ಪಾಲಿಕೆಗಳೊಂದಿಗೆ ಹಂಚಿಕೊಳ್ಳಲಾಗುತ್ತದೆ.
ಅತ್ಯುತ್ತಮ ವಿನ್ಯಾಸಕರನ್ನು ಬೆಂಗಳೂರು ನಗರಾಭಿವೃದ್ಧಿ ಸಚಿವರನ್ನು ಭೇಟಿ ಮಾಡಲು ಆಹ್ವಾನಿಸಲಾಗುತ್ತದೆ.
ಸಚಿವ ಕೃಷ್ಣ ಬೈರೇಗೌಡ ಅವರು ಮುಂದುವರಿದು, “ವಿದ್ಯಾರ್ಥಿಗಳು, ವಿನ್ಯಾಸಕರು ಮತ್ತು ಸ್ಥಳೀಯ ನಿವಾಸಿಗಳು – ಹೀಗೆ ಎಲ್ಲಡೆಯಿಂದಲೂ ಉತ್ತಮ ಆಲೋಚನೆಗಳು ಬರಬೇಕೆಂದು ನಾವು ಬಯಸುತ್ತೇವೆ. ಅತ್ಯುತ್ತಮ ಪ್ರಸ್ತಾಪಗಳನ್ನು ಪ್ರದರ್ಶಿಸಲು, ಚರ್ಚಿಸಲು ಮತ್ತು ಸಾಧ್ಯವಾದಷ್ಟು ಅನುಷ್ಠಾನಗೊಳಿಸಲು ಪರಿಗಣಿಸಲಾಗುವುದು,” ಎಂದರು.
ವಿನ್ಯಾಸ ಸಲ್ಲಿಕೆಯ ವಿವರಗಳು
- ಕೊನೆಯ ದಿನಾಂಕ: ನವೆಂಬರ್ 15, 2026
- ಇಮೇಲ್ ವಿಳಾಸ: support@bengalurujatre.in
- ಪ್ರದರ್ಶನ: ಡಿಸೆಂಬರ್ 4 ರಿಂದ 13, 2026 (ಬೆಂಗಳೂರು ಜಾತ್ರೆಯ ಸಂದರ್ಭದಲ್ಲಿ)
ಆಯ್ಕೆಯಾದ ಅತ್ಯುತ್ತಮ ವಿನ್ಯಾಸಕರನ್ನು ತಮ್ಮ ಆಲೋಚನೆಗಳನ್ನು ಹಂಚಿಕೊಳ್ಳಲು ಮತ್ತು ಮುಂದಿನ ಕ್ರಮಗಳ ಕುರಿತು ಚರ್ಚಿಸಲು ಬೆಂಗಳೂರು ನಗರಾಭಿವೃದ್ಧಿ ಸಚಿವರ ಭೇಟಿಗೆ ಆಹ್ವಾನಿಸಲಾಗುವುದು.