ಬೆಂಗಳೂರು: ಭಾರತದ ಶ್ರೀಮಂತ ಇತಿಹಾಸ, ಸಾಂಸ್ಕೃತಿಕ ಪರಂಪರೆ ಹಾಗೂ ಮಹಾನ್ ರಾಜ-ಚಕ್ರವರ್ತಿಗಳ ಸಾಧನೆಗಳನ್ನು ಇಂದಿನ ಪೀಳಿಗೆಗೆ ಪರಿಚಯಿಸುವುದರ ಜೊತೆಗೆ, ಪ್ರತಿಭಾವಂತ ಕಲಾವಿದರಿಗೆ ಆರ್ಥಿಕ ನೆರವು ಮತ್ತು ಸೂಕ್ತ ವೇದಿಕೆ ಕಲ್ಪಿಸುವ ಉದ್ದೇಶದಿಂದ ಪರಮ್ ಫೌಂಡೇಶನ್‌ನ ಪರಮ್ ಕಲ್ಚರ್‌ ವಿಶೇಷ ಕಲಾ ಪ್ರೋತ್ಸಾಹ ಯೋಜನೆಯನ್ನು ಹಮ್ಮಿಕೊಂಡಿದೆ.
ಇದರಡಿ ಆಯ್ಕೆಯಾದ ಕಲಾವಿದರಿಗೆ ₹2 ಲಕ್ಷ ಪ್ರೋತ್ಸಾಹಧನ ನೀಡುವುದರೊಂದಿಗೆ, ಅವರ ಕಲಾ ಪ್ರದರ್ಶನಕ್ಕೆ ಅಗತ್ಯವಿರುವ ವೇದಿಕೆ, ತಾಲೀಮು ಸ್ಥಳ, ಧ್ವನಿ, ಬೆಳಕು ಸೇರಿದಂತೆ ವಿವಿಧ ತಾಂತ್ರಿಕ ಸೌಲಭ್ಯಗಳನ್ನೂ ಸಂಸ್ಥೆಯೇ ಒದಗಿಸುತ್ತಿದೆ. ಈ ಉಪಕ್ರಮದ ಭಾಗವಾಗಿ ಭಾರತದ ಇಬ್ಬರು ಐತಿಹಾಸಿಕ ಚಕ್ರವರ್ತಿಗಳ ಜೀವನಗಾಥೆಯನ್ನು ಆಧರಿಸಿದ ‘ಪುನರ್ನವ’ ವಿಶೇಷ ನೃತ್ಯ-ರಂಗಪ್ರಸ್ತುತಿ ಅಕ್ಟೋಬರ್ 31ರಂದು ಸಂಜೆ 6 ಗಂಟೆಯಿಂದ ನಗರದ ಕಲಾ ಸಂಭ್ರಮದಲ್ಲಿ ಅನಾವರಣಗೊಳ್ಳಲಿದೆ.
ಕಲಾವಿದರಿಗೆ ₹2 ಲಕ್ಷ ಪ್ರೋತ್ಸಾಹಧನ
ಕಲಾವಿದರ ಸೃಜನಶೀಲತೆ ಹಾಗೂ ಹೊಸ ಪ್ರಯೋಗಗಳಿಗೆ ಉತ್ತೇಜನ ನೀಡುವ ಉದ್ದೇಶದಿಂದ ಪರಮ್ ಫೌಂಡೇಶನ್ ತನ್ನ ‘ಕಲಾ ಪ್ರಸ್ತುತಿ’ ಯೋಜನೆಯಡಿ ಕಲಾವಿದರಿಂದ ಅರ್ಜಿಗಳನ್ನು ಆಹ್ವಾನಿಸಿತ್ತು. ಕಳೆದ ಸಾಲಿನಲ್ಲಿ ಈ ಯೋಜನೆಗೆ ಸುಮಾರು 40 ಅರ್ಜಿಗಳು ಸಲ್ಲಿಕೆಯಾಗಿದ್ದು, ಅವುಗಳ ಪರಿಶೀಲನೆ ಬಳಿಕ ಎಂಟು ಕಲಾವಿದರನ್ನು ಆಯ್ಕೆ ಮಾಡಲಾಗಿದೆ. ಆಯ್ಕೆಯಾದ ಕಲಾವಿದರ ಕಲಾ ಪ್ರದರ್ಶನಕ್ಕೆ ₹2 ಲಕ್ಷ ಮೊತ್ತದ ಪ್ರೋತ್ಸಾಹಧನ ನೀಡಲಾಗುತ್ತಿದೆ.
ಕಲಾವಿದರು ತಮ್ಮ ಪ್ರದರ್ಶನವನ್ನು ರೂಪಿಸುವ ಸಂದರ್ಭದಲ್ಲಿ ಎದುರಿಸುವ ಆರ್ಥಿಕ ಹಾಗೂ ತಾಂತ್ರಿಕ ಸವಾಲುಗಳನ್ನು ನಿವಾರಣೆ ಮಾಡುವುದು ಈ ಯೋಜನೆಯ ಪ್ರಮುಖ ಉದ್ದೇಶವಾಗಿದೆ. ಕೇವಲ ಆರ್ಥಿಕ ನೆರವು ನೀಡುವುದಕ್ಕೆ ಸೀಮಿತವಾಗದೆ, ಪ್ರದರ್ಶನಕ್ಕೆ ಅಗತ್ಯವಿರುವ ಸ್ಥಳ, ತಾಲೀಮು ವ್ಯವಸ್ಥೆ, ವೇದಿಕೆ ನಿರ್ಮಾಣ, ಧ್ವನಿ ಮತ್ತು ಬೆಳಕಿನ ವ್ಯವಸ್ಥೆ ಸೇರಿದಂತೆ ಸಂಪೂರ್ಣ ತಾಂತ್ರಿಕ ಸೌಲಭ್ಯಗಳನ್ನು ಫೌಂಡೇಶನ್ ಕಲ್ಪಿಸುತ್ತಿದೆ. ಇದರಿಂದ ಕಲಾವಿದರು ತಮ್ಮ ಕಲಾ ಪ್ರದರ್ಶನದ ಗುಣಮಟ್ಟ ಮತ್ತು ಸೃಜನಶೀಲತೆಗೆ ಹೆಚ್ಚಿನ ಗಮನ ನೀಡಲು ಸಾಧ್ಯವಾಗಲಿದೆ.
ರಾಜಾ ರಾಣಾ ಕುಂಭ, ರಾಜರಾಜ ಚೋಳರ ಇತಿಹಾಸಕ್ಕೆ ನೃತ್ಯ ರೂಪ
‘ಪುನರ್ನವ’ ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯೆಂದರೆ ಭಾರತದ ಇತಿಹಾಸದಲ್ಲಿ ಮಹತ್ವದ ಸ್ಥಾನ ಪಡೆದಿರುವ ಇಬ್ಬರು ರಾಜರ ಜೀವನ ಮತ್ತು ಸಾಧನೆಗಳನ್ನು ವಿಭಿನ್ನ ಶಾಸ್ತ್ರೀಯ ನೃತ್ಯ ಪ್ರಕಾರಗಳ ಮೂಲಕ ವೇದಿಕೆಯಲ್ಲಿ ಕಟ್ಟಿಕೊಡುತ್ತಿರುವುದು.
ಮೇವಾಡದ ಪ್ರಸಿದ್ಧ ಆಡಳಿತಗಾರ ರಾಜಾ ರಾಣಾ ಕುಂಭ ಅವರ ಸಾಹಸ, ಆಡಳಿತ ಮತ್ತು ಐತಿಹಾಸಿಕ ಕೊಡುಗೆಗಳನ್ನು ಆಧರಿಸಿದ ನೃತ್ಯ ರೂಪಕವನ್ನು ನವೀನ್ ಆರ್. ಹೆಗಡೆ ಅವರು ಪ್ರಸ್ತುತಪಡಿಸಲಿದ್ದಾರೆ. ಕಥಕ್ ಮತ್ತು ರಂಗಭೂಮಿಯ ಅಂಶಗಳನ್ನು ಒಳಗೊಂಡ ಈ ಪ್ರಸ್ತುತಿ ರಾಜಾ ರಾಣಾ ಕುಂಭ ಅವರ ಜೀವನಗಾಥೆಯನ್ನು ಕಲಾತ್ಮಕವಾಗಿ ಅನಾವರಣಗೊಳಿಸಲಿದೆ.
ಅದೇ ರೀತಿ, ಚೋಳ ಸಾಮ್ರಾಜ್ಯದ ಪ್ರಸಿದ್ಧ ಚಕ್ರವರ್ತಿ ಹಾಗೂ ತಮಿಳುನಾಡಿನ ಬೃಹದೀಶ್ವರ ದೇಗುಲದ ನಿರ್ಮಾಣಕ್ಕೆ ಕಾರಣರಾದ ರಾಜರಾಜ ಚೋಳರ ಆಡಳಿತ, ಸಾಧನೆ ಮತ್ತು ಐತಿಹಾಸಿಕ ಪರಂಪರೆಯನ್ನು ಸಮುಧ್ಯತಾ ಭಟ್ ಅವರು ಭರತನಾಟ್ಯದ ಮೂಲಕ ಪ್ರಸ್ತುತಪಡಿಸಲಿದ್ದಾರೆ. ಈ ಎರಡೂ ಪ್ರಸ್ತುತಿಗಳು ಇತಿಹಾಸವನ್ನು ಕೇವಲ ಕಥನವಾಗಿ ಹೇಳದೆ, ನೃತ್ಯ, ಸಂಗೀತ ಮತ್ತು ರಂಗಾಭಿವ್ಯಕ್ತಿಯ ಮೂಲಕ ಪ್ರೇಕ್ಷಕರ ಮುಂದೆ ಜೀವಂತಗೊಳಿಸುವ ಪ್ರಯತ್ನವಾಗಿವೆ.
ಪಂಡಿತ್ ಸಮೀರ್ ರಾವ್ ಅವರಿಂದ ಮೂಲ ಸಂಗೀತ ಸಂಯೋಜನೆ
ಈ ವಿಶೇಷ ರಂಗಪ್ರಸ್ತುತಿಗಳಿಗೆ ಖ್ಯಾತ ಸಂಗೀತ ಕಲಾವಿದ ಪಂಡಿತ್ ಸಮೀರ್ ರಾವ್ ಅವರು ಮೂಲ ಸಂಗೀತ ಸಂಯೋಜನೆ ಒದಗಿಸಿದ್ದಾರೆ. ಇತಿಹಾಸದ ಸನ್ನಿವೇಶಗಳು ಮತ್ತು ನೃತ್ಯಾಭಿವ್ಯಕ್ತಿಗೆ ಪೂರಕವಾಗಿ ಸಂಗೀತವನ್ನು ರೂಪಿಸಲಾಗಿದೆ. ಇತಿಹಾಸಕಾರರಾದ ಡಾ. ಅನುರಾಧಾ ವಿ. ಅವರು ಕಾರ್ಯಕ್ರಮದ ಸಂವಾದ ನಿರ್ವಹಣೆ ಮಾಡಲಿದ್ದಾರೆ.
ಕಲಾ ಪರಂಪರೆಯ ಉಳಿವಿಗೆ ಹೊಸ ಪ್ರಯತ್ನ
ಭಾರತದ ಶ್ರೀಮಂತ ಸಾಂಸ್ಕೃತಿಕ ಪರಂಪರೆ, ಕಡಿಮೆ ಪರಿಚಿತ ಐತಿಹಾಸಿಕ ಕಥೆಗಳು ಹಾಗೂ ವಿಭಿನ್ನ ಕಲಾ ಪ್ರಕಾರಗಳನ್ನು ಜನರಿಗೆ ತಲುಪಿಸುವುದು ಪರಮ್ ಕಲ್ಚರ್‌ನ ಈ ಉಪಕ್ರಮದ ಆಶಯವಾಗಿದೆ. ಕಲಾವಿದರು ತಮ್ಮದೇ ಆದ ಹೊಸ ಪರಿಕಲ್ಪನೆಗಳೊಂದಿಗೆ ಪ್ರದರ್ಶನಗಳನ್ನು ರೂಪಿಸಲು ಆರ್ಥಿಕ ನೆರವು ಮತ್ತು ಅಗತ್ಯ ಸೌಲಭ್ಯಗಳನ್ನು ಒದಗಿಸುವ ಮೂಲಕ ಕಲಾ ಕ್ಷೇತ್ರದಲ್ಲಿ ಹೊಸ ಪ್ರಯೋಗಗಳಿಗೆ ಸಂಸ್ಥೆ ಪ್ರೋತ್ಸಾಹ ನೀಡುತ್ತಿದೆ.