ಬೆಂಗಳೂರು:ಪ್ರಸಿದ್ಧ ಬನ್ನೇರುಘಟ್ಟ ಜೈವಿಕ ಉದ್ಯಾನವನದಲ್ಲಿ (BBP) ಪ್ರವಾಸಿಗರಿಗೆ ವಿಶ್ವದರ್ಜೆಯ ಸೌಲಭ್ಯಗಳನ್ನು ಒದಗಿಸಲು ಹಾಗೂ ವನ್ಯಜೀವಿಗಳ ಸಂರಕ್ಷಣೆಯನ್ನು ಮತ್ತಷ್ಟು ಬಲಪಡಿಸುವ ನಿಟ್ಟಿನಲ್ಲಿ ಸರ್ಕಾರ ಮಹತ್ವದ ಹೆಜ್ಜೆ ಇಟ್ಟಿದೆ. ಉದ್ಯಾನವನದಲ್ಲಿ ಒಟ್ಟು 38 ಕೋಟಿ ರೂಪಾಯಿಗಳ ವೆಚ್ಚದಲ್ಲಿ ನಿರ್ಮಿಸಲಾಗಿರುವ ವಿವಿಧ ಅಭಿವೃದ್ಧಿ ಕಾಮಗಾರಿಗಳು ಹಾಗೂ ನೂತನ ಸೌಲಭ್ಯಗಳನ್ನು ಅರಣ್ಯ, ಪರಿಸರ ಮತ್ತು ಜೀವಿಶಾಸ್ತ್ರ ಸಚಿವರಾದ ರಾಮಲಿಂಗಾ ರೆಡ್ಡಿ ಅವರು ಸೋಮವಾರ ಅಧಿಕೃತವಾಗಿ ಉದ್ಘಾಟಿಸಿದರು.
ಉದ್ಘಾಟನೆಯ ಬಳಿಕ ಮಾತನಾಡಿದ ಸಚಿವರು, ವನ್ಯಜೀವಿಗಳ ಆರೈಕೆ, ಸಿಬ್ಬಂದಿಗಳ ಕ್ಷೇಮಾಭಿವೃದ್ಧಿ ಮತ್ತು ಪರಿಸರ ಸ್ನೇಹಿ ಪ್ರವಾಸೋದ್ಯಮಕ್ಕೆ ಆದ್ಯತೆ ನೀಡಿ ಹಲವು ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ ಎಂದರು.
ಲೋಕಾರ್ಪಣೆಗೊಂಡ ನೂತನ ಸೌಲಭ್ಯಗಳು ಹಾಗೂ ಅಭಿವೃದ್ಧಿ ಕಾಮಗಾರಿಗಳು:
ಪರಿಸರ ಸ್ನೇಹಿ ಸಾರಿಗೆ: ಪ್ರವಾಸಿಗರ ಸುಲಭ ಸಂಚಾರಕ್ಕಾಗಿ ನೂತನ ಎಲೆಕ್ಟ್ರಿಕ್ (ಇವಿ) ಸವಾರಿ ವಾಹನಗಳಿಗೆ ಸಚಿವರು ಚಾಲನೆ ನೀಡಿದರು.
ನೂತನ ಆಡಳಿತ ಭವನ ‘ಅಡವಿ’: ಉದ್ಯಾನವನದ ಆಡಳಿತಾತ್ಮಕ ಚಟುವಟಿಕೆಗಳನ್ನು ಒಂದೇ ಸೂರಿನಡಿ ತರಲು ನಿರ್ಮಿಸಲಾಗಿರುವ ನೂತನ ಆಡಳಿತ ಕಚೇರಿ “ಅಡವಿ” ಕಟ್ಟಡ ಮತ್ತು ನವೀಕೃತ ಮುಖ್ಯ ಪ್ರವೇಶ ದ್ವಾರವನ್ನು ಲೋಕಾರ್ಪಣೆಗೊಳಿಸಲಾಯಿತು.
ವನ್ಯಜೀವಿ ಆರೈಕೆ ಮತ್ತು ಮೂಲಸೌಕರ್ಯ: ಪ್ರಾಣಿಗಳ ಆರೋಗ್ಯ ಮತ್ತು ನಿರ್ವಹಣೆಗೆ ಪೂರಕವಾಗಿ ನೂತನ ‘ಲೈವ್ ಫೀಡ್ ಘಟಕ’, ಪ್ರಾಣಿಗಳ ತಪಾಸಣೆಗೆ ‘ಕ್ಯಾರಂಟೈನ್ ಬ್ಲಾಕ್’ ಹಾಗೂ ಸಸ್ಯೋದ್ಯಮಕ್ಕಾಗಿ ‘ಕೇಂದ್ರೀಯ ನರ್ಸರಿ’ ಅನ್ನು ಉದ್ಘಾಟಿಸಲಾಯಿತು.
ಸಿಬ್ಬಂದಿ ಕ್ಷೇಮಾಭಿವೃದ್ಧಿ ಹಾಗೂ ಪ್ರವಾಸಿಗರ ಆಕರ್ಷಣೆ: ಅರಣ್ಯ ಇಲಾಖೆ ಸಿಬ್ಬಂದಿಗಳಿಗಾಗಿ ನಿರ್ಮಿಸಲಾಗಿರುವ ವಸತಿಗೃಹಗಳು, ಪ್ರವಾಸಿಗರಿಗಾಗಿ ನೂತನ ‘ಝೂ ಶಾಪ್’ ಹಾಗೂ ‘ಸುವರ್ಣಮುಖಿ ಕೆಫೆ’ ಗೆ ಚಾಲನೆ ನೀಡಲಾಯಿತು.
ನೂತನ ಪ್ರಾಣಿ-ಪಕ್ಷಿ ಆವರಣಗಳು: ವೀಕ್ಷಕರ ಆಕರ್ಷಣೆಗೆ ತೋಳಗಳು, ಚೀತಾ, ಎಮು ಮತ್ತು ರಿಯಾ ಪಕ್ಷಿಗಳು ಹಾಗೂ ಫೆಸೆಂಟ್ ಪಕ್ಷಿಗಳನ್ನೊಳಗೊಂಡ ಹೊಸ ಆವರಣಗಳನ್ನು (Enclosures) ಉದ್ಘಾಟಿಸಲಾಯಿತು.
ಆನೆ ಆರೈಕೆ ಕೇಂದ್ರ ವೀಕ್ಷಣೆ:
ಕಾರ್ಯಕ್ರಮದ ಭಾಗವಾಗಿ ಸಚಿವರು ಸಫಾರಿ ಪ್ರದೇಶಕ್ಕೆ ಭೇಟಿ ನೀಡಿ ಜೈವಿಕ ಉದ್ಯಾನವನದ ವನ್ಯಜೀವಿ ಸಂರಕ್ಷಣಾ ಚಟುವಟಿಕೆಗಳನ್ನು ಪರಿಶೀಲಿಸಿದರು. ಈ ವೇಳೆ ಆನೆಗಳ ಸೌಕರ್ಯ, ಆರೋಗ್ಯ ಮತ್ತು ಸುಸ್ಥಿರ ನಿರ್ವಹಣೆಗೆ ಮೀಸಲಾಗಿರುವ “ಸುವರ್ಣ ಆನೆ ಆರೈಕೆ ಕೇಂದ್ರ”ದ ನೂತನ ವೀಕ್ಷಣಾ ಗೋಪುರವನ್ನು ಉದ್ಘಾಟಿಸಿ ವೀಕ್ಷಿಸಿದರು.
ದಿವಂಗತ ಡಾ. ಸಮೀಕ್ಷಾ ಅವರ ನೆನಪಿನಲ್ಲಿ ನಾಮಕರಣ:
ಇದೇ ಸಂದರ್ಭದಲ್ಲಿ ಸಚಿವರು ಅತ್ಯಂತ ಭಾವುಕ ಹಾಗೂ ಶ್ಲಾಘನೀಯ ನಿರ್ಧಾರವೊಂದನ್ನು ಪ್ರಕಟಿಸಿದರು. ಇತ್ತೀಚೆಗೆ ಶಿವಮೊಗ್ಗದಲ್ಲಿ ಹಿಪ್ಪೋಪೊಟಮಸ್ ಒಂದಕ್ಕೆ ಚಿಕಿತ್ಸೆ ನೀಡುವ ವೇಳೆ ದುರದೃಷ್ಟವಶಾತ್ ಪ್ರಾಣ ಕಳೆದುಕೊಂಡ ಕರ್ತವ್ಯನಿಷ್ಠ ಪಶುವೈದ್ಯಾಧಿಕಾರಿ ಡಾ. ಸಮೀಕ್ಷಾ ಅವರ ಸೇವೆಯನ್ನು ಸ್ಮರಿಸಿದ ಸಚಿವರು, ಅವರ ನೆನಪಿನಲ್ಲಿ ಬನ್ನೇರುಘಟ್ಟ ಉದ್ಯಾನವನದ ಹಿಪ್ಪೋಪೊಟಮಸ್ ಬ್ಲಾಕ್ ಹಾಗೂ ನೂತನ ಮರಿ ಹಿಪ್ಪೋಪೊಟಮಸ್‌ಗೆ “ಸಮೀಕ್ಷಾ” ಎಂದು ನಾಮಕರಣ ಮಾಡಲು ಅಧಿಕಾರಿಗಳಿಗೆ ಸೂಚಿಸಿದರು.
ಈ ಕಾರ್ಯಕ್ರಮದಲ್ಲಿ ಶಾಸಕರಾದ ಬಿ. ಶಿವಣ್ಣ, ಶಾಸಕರಾದ ಎಂ. ಕೃಷ್ಣಪ್ಪ, ಅರಣ್ಯ ಪಡೆ ಮುಖ್ಯಸ್ಥರು ಹಾಗೂ ಪ್ರಧಾನ ಮುಖ್ಯ ಅರಣ್ಯ ಸಂರಕ್ಷಣಾಧಿಕಾರಿ ರವಿ ಬಿ. ಪಿ. ಸೇರಿದಂತೆ ಇಲಾಖೆಯ ಉನ್ನತಾಧಿಕಾರಿಗಳು ಉಪಸ್ಥಿತರಿದ್ದರು.