ತಿರುಮಲ:ಮೇ ತಿಂಗಳಲ್ಲಿ ಕಲಿಯುಗ ವೈಕುಂಠನಾಥನಾದ ಶ್ರೀ ವೆಂಕಟೇಶ್ವರ ಸ್ವಾಮಿಗೆ ಭಕ್ತರು ಅತ್ಯಂತ ಭಕ್ತಿಯಿಂದ ಸಮರ್ಪಿಸುವ ಕೇಶರಾಶಿ ಅಥವಾ ‘ಬ್ಲಾಕ್ ಗೋಲ್ಡ್’ (Black Gold)* ಸಂಗ್ರಹದಲ್ಲಿ ಗಣನೀಯ ಏರಿಕೆಯಾಗಿದೆ. ಇದೊಂದು ಹೊಸ ದಾಖಲೆಯಾಗಿದೆ ಎಂದು ಟಿಟಿಡಿ ಆಡಳಿತ ಮಂಡಳಿ ಸದಸ್ಯರಾದ ನರೇಶ್ ಎಸ್. ತಿಳಿಸಿದ್ದಾರೆ.
ಈ ಕುರಿತು ಪತ್ರಿಕಾ ಪ್ರಕಟಣೆ ನೀಡಿರುವ ಅವರು, “ಭಕ್ತರಿಗೆ ಸುಗಮ ಹಾಗೂ ತೊಂದರೆ ರಹಿತ ಸೇವೆ ಒದಗಿಸಲು ತಿರುಮಲ ತಿರುಪತಿ ದೇವಸ್ಥಾನಂ (TTD) ವ್ಯಾಪಕ ಸಿದ್ಧತೆಗಳನ್ನು ಮಾಡಿಕೊಂಡಿದೆ. ದಿನದ 24 ಗಂಟೆಯೂ ನಿರಂತರವಾಗಿ ಕೇಶ ಮುಂಡನ ಸೇವೆ ಲಭ್ಯವಾಗುವಂತೆ ಸುಸಜ್ಜಿತ ವ್ಯವಸ್ಥೆ ಮಾಡಲಾಗಿದೆ. ಈ ವರ್ಷದ ಮೇ 27 ರವರೆಗೆ ಬರೋಬ್ಬರಿ 12,43,063 ಭಕ್ತರು ತಿರುಮಲೆಯಲ್ಲಿ ಕೇಶ ಮುಂಡನ ಮಾಡಿಸಿಕೊಂಡು ಸ್ವಾಮಿಗೆ ತಮ್ಮ ಹರಕೆ ತೀರಿಸಿದ್ದಾರೆ. ಮೇ 2024 ರಲ್ಲಿ 10,65,729 ಹಾಗೂ ಮೇ 2025 ರಲ್ಲಿ 10,18,370 ರಷ್ಟಿತ್ತು. ಕಳೆದ ಎರಡು ವರ್ಷಗಳಿಗೆ ಹೋಲಿಸಿದರೆ ಭಕ್ತರ ಸಂಖ್ಯೆಯಲ್ಲಿ ಭಾರಿ ಹೆಚ್ಚಳವಾಗಿದೆ,” ಎಂದು ವಿವರಿಸಿದ್ದಾರೆ.
ಬೇಸಿಗೆ ರಜೆ ಮತ್ತು ಸತತ ವಾರಾಂತ್ಯದ ರಜೆಗಳ ಕಾರಣದಿಂದಾಗಿ ತಿರುಮಲೆಯಲ್ಲಿ ಭಕ್ತರ ದಟ್ಟಣೆ ಹಿಂದೆಂದಿಗಿಂತಲೂ ಹೆಚ್ಚಾಗಿದೆ. ಮೇ 18 ರಿಂದ ಮೇ 23 ರವರೆಗೆ ಸತತ ಆರು ದಿನಗಳ ಕಾಲ ಪ್ರತಿದಿನ 50,000ಕ್ಕೂ ಹೆಚ್ಚು ಭಕ್ತರು ಕೇಶ ಸಮರ್ಪಿಸಿದ್ದಾರೆ. ವಿಶೇಷವೆಂದರೆ, ಮೇ 23 ರಂದು ಒಂದೇ ದಿನ ದಾಖಲೆಯ 57,580 ಭಕ್ತರು ಕೇಶ ಸಮರ್ಪಿಸಿರುವುದು ಆಡಳಿತ ಮಂಡಳಿಯ ಸುಗಮ ವ್ಯವಸ್ಥೆಗೆ ಸಾಕ್ಷಿಯಾಗಿದೆ.
ತಿರುಮಲೆಯಾದ್ಯಂತ ಕಲ್ಯಾಣಕಟ್ಟೆ (ಕೇಶ ಮುಂಡನ) ಕೇಂದ್ರಗಳು:
ಭಕ್ತರ ಕಾಯುವ ಸಮಯವನ್ನು ಕಡಿಮೆ ಮಾಡಲು ಮತ್ತು ಸುಲಭವಾಗಿ ಸೇವೆ ಒದಗಿಸಲು ಟಿಟಿಡಿಯು ತಿರುಮಲೆಯಾದ್ಯಂತ ಅನೇಕ ಕಲ್ಯಾಣಕಟ್ಟೆ ಕೇಂದ್ರಗಳನ್ನು ಸ್ಥಾಪಿಸಿದೆ. ಮುಖ್ಯ ಕಲ್ಯಾಣಕಟ್ಟೆಯ ಜೊತೆಗೆ, PAC-1, PAC-2, PAC-3, PAC-5, GNC, HVC, ಸಪ್ತಗಿರಿ ಅತಿಥಿಗೃಹ, ನಂದಕಂ ಅತಿಥಿಗೃಹ, ಕೌಸ್ತುಭಂ ಅತಿಥಿಗೃಹ, ಶ್ರೀ ವೆಂಕಟೇಶ್ವರ ಅತಿಥಿಗೃಹ ಮತ್ತು ಶ್ರೀ ಪದ್ಮಾವತಿ ಅತಿಥಿಗೃಹಗಳಲ್ಲಿ ಒಟ್ಟು 11 ಮಿನಿ ಕೇಶ ಮುಂಡನ ಕೇಂದ್ರಗಳು ಅತ್ಯಂತ ಸುಗಮವಾಗಿ ಕಾರ್ಯನಿರ್ವಹಿಸುತ್ತಿವೆ.
ತಿರುಮಲೆಯಲ್ಲಿ 269 ಮಹಿಳಾ ಕ್ಷೌರಿಕರು ಸೇರಿದಂತೆ ಒಟ್ಟು 1,152 ಕ್ಷೌರಿಕರು ಭಕ್ತರಿಗೆ ನಿರಂತರ ಸೇವೆ ಸಲ್ಲಿಸುತ್ತಿದ್ದಾರೆ. ಸಾಮಾನ್ಯವಾಗಿ ಪ್ರತಿ ಕ್ಷೌರಿಕರು ತಮ್ಮ ಆರು ಗಂಟೆಗಳ ಪಾಳಿಯಲ್ಲಿ ಸುಮಾರು 40 ಭಕ್ತರಿಗೆ ಕೇಶ ಮುಂಡನ ಮಾಡುತ್ತಾರೆ. ಆದರೆ ಭಕ್ತರ ದಟ್ಟಣೆಯನ್ನು ಗಮನದಲ್ಲಿಟ್ಟುಕೊಂಡು, ಸುಮಾರು 250 ಕ್ಷೌರಿಕರಿಗೆ ತಮ್ಮ ಪಾಳಿಯ ಅವಧಿಯನ್ನು ವಿಸ್ತರಿಸಲಾಗಿದೆ. ಪ್ರತಿ ಕ್ಷೌರಿಕರು ಹೆಚ್ಚುವರಿಯಾಗಿ 50 ಭಕ್ತರಿಗೆ ಸೇವೆ ನೀಡುವ ಮೂಲಕ ತಡೆರಹಿತ ಸೇವೆಯನ್ನು ಖಚಿತಪಡಿಸುತ್ತಿದ್ದಾರೆ ಎಂದು ಹೇಳಿದ್ದಾರೆ.
ನೈರ್ಮಲ್ಯ ಮತ್ತು ಭಕ್ತರ ಕಲ್ಯಾಣಕ್ಕೆ ಹೆಚ್ಚಿನ ಆದ್ಯತೆ:
ಭಕ್ತರು ಹಾಗೂ ಕ್ಷೌರಿಕರ ಆರೋಗ್ಯದ ದೃಷ್ಟಿಯಿಂದ, ಎಲ್ಲಾ ಕಲ್ಯಾಣಕಟ್ಟೆ ಕೇಂದ್ರಗಳಲ್ಲಿ ಸ್ವಚ್ಛತೆ ಮತ್ತು ನೈರ್ಮಲ್ಯಕ್ಕೆ ಅತ್ಯುನ್ನತ ಆದ್ಯತೆ ನೀಡಲಾಗಿದೆ. ಕೇಶ ಮುಂಡನಕ್ಕೆ ಬಳಸುವ ಬ್ಲೇಡ್ಗಳನ್ನು ಮೊದಲು ಸೋಡಿಯಂ ದ್ರಾವಣದಲ್ಲಿ ಕ್ರಿಮಿನಾಶಗೊಳಿಸಿ, ಬಳಿಕ ಡೆಟ್ಟಾಲ್ನಿಂದ ಸ್ವಚ್ಛಗೊಳಿಸಿ ಬಳಸಲಾಗುತ್ತಿದೆ. ಸಮರ್ಪಣೆಯಾದ ಕೇಶರಾಶಿಯನ್ನು ನಿರಂತರವಾಗಿ ಒಟ್ಟುಗೂಡಿಸಿ ಅತ್ಯಂತ ಸುರಕ್ಷಿತವಾಗಿ ಸಂರಕ್ಷಿಸಲಾಗುತ್ತಿದೆ.
ಹರಕೆ ಹೊತ್ತು ಬರುವ ಅಸಂಖ್ಯಾತ ಭಕ್ತರಿಗೆ ನಮ್ಮ ಸವಿತಾ ಸಮಾಜದ ಬಂಧುಗಳು ಹಗಲಿರುಳು ಶ್ರಮವಹಿಸಿ ಅತ್ಯಂತ ಶ್ರದ್ಧೆಯಿಂದ ಕೇಶ ಮುಂಡನ ಸೇವೆ ನೀಡುತ್ತಿದ್ದಾರೆ. ಸಮಾಜದ ಆತ್ಮಶುದ್ಧಿಗೆ ತನ್ನದೇ ಆದ ವಿಶೇಷ ಕೊಡುಗೆ ನೀಡುವ ಈ ಕಾಯಕ ಸಮುದಾಯದ ಪ್ರತಿನಿಧಿಯಾಗಿರುವುದು ನನಗೆ ಅತೀವ ಸಂತಸ ತಂದಿದೆ. ಸವಿತಾ ಸಮಾಜದ ಪ್ರತಿನಿಧಿಯಾಗಿ ಟಿಟಿಡಿ ಆಡಳಿತ ಮಂಡಳಿಯಲ್ಲಿ ಸೇವೆ ಸಲ್ಲಿಸುತ್ತಿರುವ ನಾನು, ಇಲ್ಲಿ ಕಾರ್ಯನಿರ್ವಹಿಸುತ್ತಿರುವ ಕ್ಷೌರಿಕರ ಜೀವನಮಟ್ಟ ಮತ್ತು ಉದ್ಯೋಗ ಭದ್ರತೆಯನ್ನು ಸುಧಾರಿಸುವ ನಿಟ್ಟಿನಲ್ಲಿ ಹೆಚ್ಚಿನ ಆದ್ಯತೆ ನೀಡಿರುವುದು ನನಗೆ ವೈಯಕ್ತಿಕವಾಗಿ ಅತ್ಯಂತ ತೃಪ್ತಿ ತಂದಿದೆ ಎಂದು ಟಿಟಿಡಿ ಆಡಳಿತ ಮಂಡಳಿ ಸದಸ್ಯರಾದ
ನರೇಶ್ ಎಸ್. ತಿಳಿಸಿದ್ದಾರೆ.