ಮ್ಯಾಂಚೆಸ್ಟರ್: ಯುನೈಟೆಡ್ ಕಿಂಗ್‌ಡಮ್‌ನಲ್ಲಿ ಕರ್ನಾಟಕ ಪ್ರವಾಸೋದ್ಯಮದ ಮಾರುಕಟ್ಟೆಯನ್ನು ವಿಸ್ತರಿಸುವ ನಿಟ್ಟಿನಲ್ಲಿ, ಕರ್ನಾಟಕ ಪ್ರವಾಸೋದ್ಯಮ ಇಲಾಖೆ ಮ್ಯಾಂಚೆಸ್ಟರ್‌ನಲ್ಲಿ ಮೊದಲ ಬಾರಿಗೆ ಪ್ರವಾಸೋದ್ಯಮ ರೋಡ್‌ಶೋ ಆಯೋಜಿಸಿದೆ.
ರೋಡ್‌ಶೋದಲ್ಲಿ 50ಕ್ಕೂ ಹೆಚ್ಚು ಪ್ರಮುಖ ಟ್ರಾವೆಲ್ ಏಜೆಂಟ್‌ಗಳು ಮತ್ತು ಟೂರ್ ಆಪರೇಟರ್‌ಗಳು ಭಾಗವಹಿಸಿದ್ದು, ಯುಕೆ ಪ್ರವಾಸೋದ್ಯಮ ಉದ್ಯಮದೊಂದಿಗೆ ನೇರ ಸಂಪರ್ಕ ಬೆಳೆಸಿ, ಕರ್ನಾಟಕವನ್ನು ಹೊಸ ಪ್ರವಾಸ ಪ್ಯಾಕೇಜ್‌ಗಳು ಮತ್ತು ಪ್ರವಾಸ ಯೋಜನೆಗಳಲ್ಲಿ ಸೇರಿಸುವ ಕುರಿತು ಸಂವಾದ ನಡೆಯಿತು.
ಕಾರ್ಯಕ್ರಮದಲ್ಲಿ ವಿಶೇಷವಾಗಿ ಕರಾವಳಿ ಕರ್ನಾಟಕ ಮತ್ತು ಮಲೆನಾಡು ಪ್ರವಾಸೋದ್ಯಮಕ್ಕೆ ಒತ್ತು ನೀಡಲಾಯಿತು. ರಾಜ್ಯದ ಕಡಲತೀರಗಳು, ಪಶ್ಚಿಮ ಘಟ್ಟಗಳು, ಪ್ಲಾಂಟೇಶನ್ ಪ್ರದೇಶಗಳು, ಪ್ರಕೃತಿ ಆಧಾರಿತ ಅನುಭವಗಳು ಹಾಗೂ ಹೆಚ್ಚು ಪ್ರಚಾರಕ್ಕೆ ಬಾರದ ಹೊಸ ಪ್ರವಾಸಿ ತಾಣಗಳನ್ನು ಪರಿಚಯಿಸಲಾಯಿತು.
ಚಿಕ್ಕಮಗಳೂರು ಮತ್ತು ಕೊಡಗು ಪ್ರದೇಶಗಳ ಕಾಫಿ ಪ್ರವಾಸೋದ್ಯಮ ಕೂಡ ಪ್ರಮುಖ ಆಕರ್ಷಣೆಯಾಗಿದ್ದು, ಕಾಫಿ ಎಸ್ಟೇಟ್‌ಗಳು, ಸ್ಥಳೀಯ ಆಹಾರ, ಪ್ರಕೃತಿ ಮತ್ತು ‘ಸ್ಲೋ ಟ್ರಾವೆಲ್’ ಅನುಭವಗಳನ್ನು ಯುಕೆ ಪ್ರವಾಸಿಗರಿಗೆ ವಿಶಿಷ್ಟ ಪ್ರವಾಸೋದ್ಯಮ ಉತ್ಪನ್ನಗಳಾಗಿ ಪರಿಚಯಿಸಲಾಯಿತು.
ಇದರ ಜೊತೆಗೆ ಕರ್ನಾಟಕದ ಪಾರಂಪರಿಕ ತಾಣಗಳು, ವನ್ಯಜೀವಿ, ವೆಲ್‌ನೆಸ್, ಲಕ್ಸುರಿ ಮತ್ತು ಬಿಸಿನೆಸ್ ಪ್ರವಾಸೋದ್ಯಮ ಅವಕಾಶಗಳನ್ನೂ ಯುಕೆ ಪ್ರವಾಸೋದ್ಯಮ ಪ್ರತಿನಿಧಿಗಳಿಗೆ ವಿವರಿಸಲಾಯಿತು.
ಪ್ರವಾಸೋದ್ಯಮ ಇಲಾಖೆ ಕಾರ್ಯದರ್ಶಿ ಡಾ. ರಾಮ್ ಪ್ರಸಾತ್ ಮನೋಹರ್, ಕೆಎಸ್‌ಟಿಡಿಸಿ ವ್ಯವಸ್ಥಾಪಕ ನಿರ್ದೇಶಕ ಶಿವಪ್ರಸಾದ್ ಪಿ.ಆರ್., ಜಂಗಲ್ ಲಾಡ್ಜಸ್ ಅಂಡ್ ರೆಸಾರ್ಟ್ಸ್ ವ್ಯವಸ್ಥಾಪಕ ನಿರ್ದೇಶಕ ಶಿವರಾಮ್ ಬಾಬು ಎಂ., ಐಎಫ್‌ಎಸ್, ಹಾಗೂ ಪ್ರವಾಸೋದ್ಯಮ ಇಲಾಖೆಯ ಜಂಟಿ ನಿರ್ದೇಶಕ ಜನಾರ್ದನ್ ಎಸ್.ಪಿ. ಕರ್ನಾಟಕದ ಪ್ರವಾಸೋದ್ಯಮ ಅವಕಾಶಗಳನ್ನು ಪರಿಚಯಿಸಿ, ಟ್ರಾವೆಲ್ ಟ್ರೇಡ್ ಪ್ರತಿನಿಧಿಗಳೊಂದಿಗೆ ಸಂವಾದ ನಡೆಸಿದರು.
“ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರ ನಾಯಕತ್ವ ಹಾಗೂ ಇಂಧನ ಮತ್ತು ಪ್ರವಾಸೋದ್ಯಮ ಸಚಿವ ಕೆ.ಜೆ. ಜಾರ್ಜ್ ಅವರ ಮಾರ್ಗದರ್ಶನದಲ್ಲಿ ಕರ್ನಾಟಕ ಪ್ರವಾಸೋದ್ಯಮವನ್ನು ಹೊಸ ಅಂತರರಾಷ್ಟ್ರೀಯ ಮಾರುಕಟ್ಟೆಗಳಿಗೆ ಕೊಂಡೊಯ್ಯಲಾಗುತ್ತಿದೆ. ಮ್ಯಾಂಚೆಸ್ಟರ್ ಕರ್ನಾಟಕ ಪ್ರವಾಸೋದ್ಯಮಕ್ಕೆ ಮಹತ್ವದ ಹೊಸ ಮಾರುಕಟ್ಟೆ. ನಮ್ಮ ಗುರಿ ಕೇವಲ ಕರ್ನಾಟಕದ ಪ್ರವಾಸಿ ತಾಣಗಳಿಗೆ ಪ್ರಚಾರ ನೀಡುವುದಲ್ಲ; ಯುಕೆ ಟ್ರಾವೆಲ್ ಏಜೆಂಟ್‌ಗಳು ಕರ್ನಾಟಕವನ್ನು ತಮ್ಮ ಪ್ರವಾಸ ಪ್ಯಾಕೇಜ್‌ಗಳಲ್ಲಿ ಸೇರಿಸಿ, ಈ ಸಂಪರ್ಕವನ್ನು ನೈಜ ಪ್ರವಾಸಿಗರ ಆಗಮನವಾಗಿ ಪರಿವರ್ತಿಸುವುದಾಗಿದೆ. ಕರಾವಳಿ ಕರ್ನಾಟಕ, ಮಲೆನಾಡು ಮತ್ತು ಕಾಫಿ ಪ್ರವಾಸೋದ್ಯಮವು ಪ್ರಕೃತಿ, ಸಂಸ್ಕೃತಿ ಹಾಗೂ ಅನುಭವಾಧಾರಿತ ಪ್ರವಾಸ ಬಯಸುವ ಯುಕೆ ಪ್ರವಾಸಿಗರಿಗೆ ಅಪಾರ ಅವಕಾಶ ಹೊಂದಿದೆ,” ಎಂದು ಡಾ. ರಾಮ್ ಪ್ರಸಾತ್ ಮನೋಹರ್ ಹೇಳಿದರು.
ಕಾರ್ಯಕ್ರಮದಲ್ಲಿ ಭಾರತದ ಕಾನ್ಸುಲ್ ಜನರಲ್ ವಿಶಾಖಾ ಯದುವಂಶಿ ಭಾಗವಹಿಸಿ, ಕರ್ನಾಟಕ ಪ್ರವಾಸೋದ್ಯಮದ ಯುಕೆ ಪ್ರಚಾರ ಕಾರ್ಯಕ್ರಮಗಳಿಗೆ ಬೆಂಬಲ ವ್ಯಕ್ತಪಡಿಸಿದರು.
ಮ್ಯಾಂಚೆಸ್ಟರ್ ರೋಡ್‌ಶೋ ಕರ್ನಾಟಕ ಪ್ರವಾಸೋದ್ಯಮದ ವಿಸ್ತೃತ ಯುಕೆ ಅಭಿಯಾನದ ಭಾಗವಾಗಿದ್ದು, ಮುಂದಿನ ಹಂತದಲ್ಲಿ World Travel Market London 2026 ಹಾಗೂ ಬರ್ಮಿಂಗ್‌ಹ್ಯಾಮ್‌ನಲ್ಲಿ ವಿಶೇಷ ರೋಡ್‌ಶೋ ನಡೆಯಲಿದೆ.