ಬೆಂಗಳೂರು: ಭಾರತದ ಸಿಲಿಕಾನ್ ಸಿಟಿ ಎಂದೇ ಖ್ಯಾತಿ ಪಡೆದಿರುವ ಬೆಂಗಳೂರಿನ ತಂತ್ರಜ್ಞಾನ ವಲಯದಲ್ಲಿ ಮತ್ತೊಂದು ಹೊಸ ಮೈಲುಗಲ್ಲು ಸ್ಥಾಪನೆಯಾಗಿದೆ. ಪ್ರಮುಖ ಗೂಗಲ್ ಕ್ಲೌಡ್ ಪಾಲುದಾರ ಸಂಸ್ಥೆಯಾದ ಎಕಾನ್ಜ್ ಐಟಿ ಸರ್ವಿಸಸ್, ಗೂಗಲ್ ಕ್ಲೌಡ್ ಸಹಯೋಗದೊಂದಿಗೆ ಬೆಂಗಳೂರಿನಲ್ಲಿ ‘ಜೆಮಿನಿ ಎಂಟರ್ಪ್ರೈಸ್ ಅನುಭವ ಕೇಂದ್ರ’ವನ್ನು ಲೋಕಾರ್ಪಣೆಗೊಳಿಸಿದೆ.
ವಾಣಿಜ್ಯ ವಲಯದಲ್ಲಿ ಕೃತಕ ಬುದ್ಧಿಮತ್ತೆ ತಂತ್ರಜ್ಞಾನದ ಬಳಕೆಯನ್ನು ವೇಗಗೊಳಿಸುವುದು ಹಾಗೂ ಉದ್ಯಮಗಳ ಡಿಜಿಟಲ್ ರೂಪಾಂತರಕ್ಕೆ ನೆರವಾಗುವುದು ಈ ಕೇಂದ್ರದ ಪ್ರಮುಖ ಉದ್ದೇಶವಾಗಿದೆ. ಇದರೊಂದಿಗೆ ಎಕಾನ್ಜ್ ತನ್ನ ನೂತನ ಕಚೇರಿಯನ್ನೂ ಉದ್ಘಾಟಿಸಿದ್ದು, ಎಂಟರ್ಪ್ರೈಸ್ ತಂತ್ರಜ್ಞಾನ, ವೃತ್ತಿಪರ ಸಲಹಾ ಸೇವೆಗಳು ಮತ್ತು ಎಐ ಸಾಮರ್ಥ್ಯಗಳನ್ನು ಒಂದೇ ಸೂರಿನಡಿ ಒದಗಿಸುವ ಬಲಿಷ್ಠ ತಂತ್ರಜ್ಞಾನ ವ್ಯವಸ್ಥೆಯನ್ನು ನಿರ್ಮಿಸಿದೆ.
ಹೊಸದಾಗಿ ಆರಂಭವಾಗಿರುವ ಈ ಕೇಂದ್ರವು ಕೇವಲ ತಂತ್ರಜ್ಞಾನ ಪ್ರದರ್ಶನ ಕೇಂದ್ರವಲ್ಲ. ಜೆಮಿನಿ ಎಂಟರ್ಪ್ರೈಸ್ ಆಧಾರಿತ ಅತ್ಯಾಧುನಿಕ ಏಜೆಂಟಿಕ್ ಎಐ ಪರಿಹಾರಗಳನ್ನು ರೂಪಿಸಲು, ಪರೀಕ್ಷಿಸಲು ಮತ್ತು ಅವುಗಳ ನೈಜ ಬಳಕೆಯನ್ನು ಅರ್ಥಮಾಡಿಕೊಳ್ಳಲು ಇದು ಪ್ರಾಯೋಗಿಕ ವೇದಿಕೆಯಾಗಿ ಕಾರ್ಯನಿರ್ವಹಿಸಲಿದೆ. ಕೃತಕ ಬುದ್ಧಿಮತ್ತೆಯ ನೈಜ ಸಾಮರ್ಥ್ಯವನ್ನು ಉದ್ಯಮಿಗಳು, ಸಂಸ್ಥೆಗಳ ತಂತ್ರಜ್ಞಾನ ನಾಯಕರು ಮತ್ತು ನಿರ್ಧಾರ ಕೈಗೊಳ್ಳುವವರು ನೇರವಾಗಿ ಅನುಭವಿಸಲು ಈ ಕೇಂದ್ರ ಅವಕಾಶ ಕಲ್ಪಿಸುತ್ತದೆ.
ಸಾಮಾನ್ಯ ಚಾಟ್ಬಾಟ್ ಬಳಕೆಗೆ ಸೀಮಿತವಾಗದೆ, ಸಂಸ್ಥೆಗಳ ಸಂಕೀರ್ಣ ಕಾರ್ಯಗಳನ್ನು ವೇಗಗೊಳಿಸುವ ಸ್ಮಾರ್ಟ್ ಮತ್ತು ಸ್ವಯಂಚಾಲಿತ ವ್ಯವಸ್ಥೆಗಳನ್ನು ರೂಪಿಸಲು ಈ ಕೇಂದ್ರ ನೆರವಾಗಲಿದೆ. ಜೆಮಿನಿ ಎಂಟರ್ಪ್ರೈಸ್ ಮೂಲಕ ವಿವಿಧ ಪ್ಲಾಟ್ಫಾರ್ಮ್ಗಳ ನಡುವೆ ಕೆಲಸಗಳನ್ನು ಸ್ವಯಂಚಾಲಿತಗೊಳಿಸುವುದು, ನೋಟ್ಬುಕ್ ಎಲ್ಎಂ ಮೂಲಕ ಬುದ್ಧಿವಂತ ಸಂಶೋಧನೆ ನಡೆಸುವುದು ಮತ್ತು ಗೂಗಲ್ನ ಏಜೆಂಟ್ ಡೆವಲಪ್ಮೆಂಟ್ ಕಿಟ್ ಬಳಸಿ ಸಂಸ್ಥೆಗಳ ಅಗತ್ಯಕ್ಕೆ ತಕ್ಕಂತೆ ಕಸ್ಟಮ್ ಎಐ ಏಜೆಂಟ್ಗಳನ್ನು ಅಭಿವೃದ್ಧಿಪಡಿಸುವ ವಿಧಾನಗಳನ್ನು ಇಲ್ಲಿ ಪ್ರದರ್ಶಿಸಲಾಗುತ್ತದೆ.
ವಿಶೇಷವಾಗಿ, ಇಲ್ಲಿನ ಏಜೆಂಟಿಕ್ ಸ್ಯಾಂಡ್ಬಾಕ್ಸ್ ವ್ಯವಸ್ಥೆಯ ಮೂಲಕ ಮಾನವ ಸಂಪನ್ಮೂಲ, ಹಣಕಾಸು, ಮಾರಾಟ ಮತ್ತು ಕಾರ್ಯಾಚರಣೆ ವಿಭಾಗಗಳಿಗೆ ಅಗತ್ಯವಿರುವ ಎಐ ಏಜೆಂಟ್ಗಳನ್ನು ಕೋಡಿಂಗ್ ಜ್ಞಾನವಿಲ್ಲದವರೂ ಸುಲಭವಾಗಿ ಸೃಷ್ಟಿಸಬಹುದು. ಸೇಲ್ಸ್ಫೋರ್ಸ್, ಸ್ಯಾಪ್, ಹಬ್ಸ್ಪಾಟ್, ಜಿರಾ ಮತ್ತು ಮೈಕ್ರೋಸಾಫ್ಟ್ 365 ಸೇರಿದಂತೆ ಪ್ರಮುಖ ಕಾರ್ಪೊರೇಟ್ ಸಾಫ್ಟ್ವೇರ್ಗಳೊಂದಿಗೆ ಎಐ ಅನ್ನು ಸಂಯೋಜಿಸಿದಾಗ ಸಂಸ್ಥೆಗಳ ಉತ್ಪಾದಕತೆ, ಕಾರ್ಯಕ್ಷಮತೆ ಮತ್ತು ತ್ವರಿತ ನಿರ್ಧಾರ ಪ್ರಕ್ರಿಯೆ ಹೇಗೆ ಸುಧಾರಿಸಬಹುದು ಎಂಬುದನ್ನು ಪ್ರಾತ್ಯಕ್ಷಿಕೆಗಳ ಮೂಲಕ ವಿವರಿಸಲಾಗುತ್ತದೆ.
ಲೋಕಾರ್ಪಣೆ ಕುರಿತು ಮಾತನಾಡಿದ ಎಕಾನ್ಜ್ ಐಟಿ ಸರ್ವಿಸಸ್ನ ಸಿಇಒ ಮತ್ತು ಸಂಸ್ಥಾಪಕ ಮೊಬಿ ಕೆ. ಬಾಬು ಅವರು, “ತಂತ್ರಜ್ಞಾನದ ಹೊಸ ಬದಲಾವಣೆಗಳನ್ನು ಅಳವಡಿಸಿಕೊಳ್ಳುವಲ್ಲಿ ಬೆಂಗಳೂರು ಸದಾ ಮುಂಚೂಣಿಯಲ್ಲಿದೆ. ಈ ನೂತನ ಅನುಭವ ಕೇಂದ್ರದ ಮೂಲಕ ಎಂಟರ್ಪ್ರೈಸ್ ಎಐ ತಂತ್ರಜ್ಞಾನದ ಮುಂದಿನ ಹಂತವನ್ನು ನಮ್ಮ ಸಿಲಿಕಾನ್ ಸಿಟಿಗೆ ಪರಿಚಯಿಸುವ ಗುರಿಯನ್ನು ನಾವು ಹೊಂದಿದ್ದೇವೆ,” ಎಂದು ಹೇಳಿದರು.
ಅತ್ಯಾಧುನಿಕ ಏಜೆಂಟಿಕ್ ಎಐ ತಂತ್ರಜ್ಞಾನವನ್ನು ಉದ್ಯಮಗಳು ನೇರವಾಗಿ ಅನುಭವಿಸಿ, ತಮ್ಮ ವ್ಯವಹಾರದ ಬೆಳವಣಿಗೆಗೆ ಆತ್ಮವಿಶ್ವಾಸದಿಂದ ಅಳವಡಿಸಿಕೊಳ್ಳಲು ನೆರವಾಗುವುದು ಈ ಕೇಂದ್ರದ ಪ್ರಮುಖ ಉದ್ದೇಶವಾಗಿದೆ. ಬ್ಯಾಂಕಿಂಗ್ ಮತ್ತು ಹಣಕಾಸು ವಲಯದಲ್ಲಿನ ವಿಮೆ ಕ್ಲೈಮ್ ಪ್ರಕ್ರಿಯೆಗಳನ್ನು ಸರಳಗೊಳಿಸುವುದು, ಆರೋಗ್ಯ ವಲಯದಲ್ಲಿನ ವೈದ್ಯಕೀಯ ದಾಖಲೆಗಳನ್ನು ನಿರ್ವಹಿಸುವುದು ಸೇರಿದಂತೆ ವಿವಿಧ ದೈನಂದಿನ ಕಾರ್ಯಗಳಲ್ಲಿ ಎಐ ತಂತ್ರಜ್ಞಾನವನ್ನು ಬಳಸಿಕೊಂಡು ಸಂಸ್ಥೆಗಳಿಗೆ ನಿಖರ ಮತ್ತು ಲಾಭದಾಯಕ ಫಲಿತಾಂಶಗಳನ್ನು ಒದಗಿಸಲು ಈ ಕೇಂದ್ರ ನೆರವಾಗಲಿದೆ ಎಂದು ಅವರು ತಿಳಿಸಿದರು.
ಉದ್ಘಾಟನಾ ಸಮಾರಂಭದಲ್ಲಿ ಗೂಗಲ್ ಕ್ಲೌಡ್ನ ವ್ಯವಸ್ಥಾಪಕ ನಿರ್ದೇಶಕಿ ತರು ದಹಿಯಾ ಮತ್ತು ಬೆಂಗಳೂರಿನ ಬ್ರಿಟಿಷ್ ಡೆಪ್ಯೂಟಿ ಹೈಕಮಿಷನ್ನ ಚಂದ್ರು ಕೆ. ಅಯ್ಯರ್ ಪಾಲ್ಗೊಂಡಿದ್ದರು. ಜಾಗತಿಕ ತಂತ್ರಜ್ಞಾನ ಹಬ್ ಆಗಿ ಬೆಂಗಳೂರು ಬೆಳೆಯುತ್ತಿರುವ ರೀತಿ ಮತ್ತು ಭವಿಷ್ಯದ ಎಐ ಆವಿಷ್ಕಾರಗಳ ಕುರಿತು ಅವರು ತಮ್ಮ ಅಭಿಪ್ರಾಯಗಳನ್ನು ಹಂಚಿಕೊಂಡರು.
ಮುಂದಿನ ದಿನಗಳಲ್ಲಿ ಈ ಕೇಂದ್ರವು ವಿವಿಧ ಕಂಪನಿಗಳ ಸಿಐಒ, ಸಿಟಿಒ ಮತ್ತು ಉದ್ಯಮ ನಾಯಕರಿಗಾಗಿ ವಿಶೇಷ ಕಾರ್ಯತಂತ್ರ ಸಭೆಗಳನ್ನು ಆಯೋಜಿಸಲಿದೆ. ಭವಿಷ್ಯದ ಎಐ ಮಾರ್ಗಸೂಚಿ, ಆಡಳಿತಾತ್ಮಕ ಆದ್ಯತೆಗಳು ಮತ್ತು ಉದ್ಯಮಗಳ ಡಿಜಿಟಲ್ ರೂಪಾಂತರದ ಹೊಸ ಅವಕಾಶಗಳನ್ನು ಅನ್ವೇಷಿಸಲು ಈ ಕೇಂದ್ರ ಮುಕ್ತ ವೇದಿಕೆಯಾಗಿ ಕಾರ್ಯನಿರ್ವಹಿಸಲಿದೆ.